السعادة .. فى خطوات

 عاوز تبقى سعيد ومبسوط ؟؟ تعالى أقولكـ 

 

1- أول حاجة قرب من ربنا هو ف ايده كل مفاتيح السعادة والفرج .. ادعيله ومتزهقش .. قرب منه ومتخافش .. "أليس الله بكاف عبده" . 

2- اسرق لحظات سعادتكـ .. أيوة اسرقها متستناش السعادة تجيلكـ لحد عندكـ دور عليها واسرقها من الدنيا .. متضيعش اى لحظة ممكن تكون مبسوط فيها اى لحظة ممكن تلاقى سعادتكـ فيها . 

3- عيش اللحظة .. عيش كل لحظاتكـ بحلوها وبمرها .. الوقت اللى بتبقى مبسوط فيه ابسط نفسكـ بيه على  قد ما تقدر اضحكـ من قلبكـ .. اضحكـ لحد ما عيونكـ تدمع متبخلش ع روحك بالفرحة .

4- متفكرش فى كلام الناس .. محدش هيزعل لزعلكـ ع فكرة فمتشغلش بالكـ بكلام اللى حواليكـ كتير وابسط نفسكـ وعيش حياتكـ لحظات السعادة قليلة لازم تستغلها لاخر ثانية فيها .

5- ابتسم :) .. آه ابتسم لاى حد وف اى وقت حتى لو حصلكـ حاجة وحشة ابتسم واحمد ربنا انكـ لسة عايش وقادر تبتسم .. الدنيا مش دايمة لحد يبقى تنكد ع روحكـ ليه ؟! ابسطـ نفسكـ واضحكـ ع الدنيا بابتسامة .

6- متشغلش بالكـ بالناس .. متفكرش فى ان الشخص ده عنده وانا معنديش .. ده مبسوط وانا لا .. اشغل نفسكـ بنفسكـ فكر ف روحكـ وازاى تبسط نفسكـ  هى تستاهل الوقت ده اكتر من الناس اللى شاغل نفسكـ بيها 

7-  الحمد لله .. السعادة متمثلة ف الجملة دى "الحمد لله" احمد ربنا ع كل حاجة بتجيلكـ ومتزعلش ربنا أكيد شايلكـ الاحسن وهيبعتلكـ فرحة اكيد تنسى بيها كل الالم اللى شوفته بس انت اصبر وخلى ثقتكـ وايمانكـ بـ ربنا كبيير . 

8- اسعد اللى حواليكـ ... مش صعبة ع فكرة ولا حاجة مستحيلة انت لو ابتسمت للى قدامكـ كدا انت اسعدته .. جرب تبسط طفل صغير جبله شيكولاتة كدا وقوله دى ليكـ وشوف الابتسامة اللى ع وجهه ازاى مجرد ما هتشوفها هتلقى نفسكـ بتبتسم وهتنسى همومكـ للحظة !

9- الماضى وقت وفات ومش هتقدر ترجعه والمستقبل لسة مجاش وف ايد ربنا متشغلش بالكـ بيه .. لكن حاضركـ هو اللى انت عايشه دلوقتى عيشه بكل لحظاته يمكن اللحظة اللى عايشها النهاردة متكونش موجودة بكرة .. استمتع بحاضركـ .

10- هذا الوقت سيمضى .. خلى الجملة دى ف بالكـ كل ما تقابلكـ مشكلة افتكر انه مهما طالت مش هتدوم معاكـ وفى النهاية هتنتهى .. الوقت مش بيقف عند لحظة ف متنكدش ع نفسكـ وقول لنفسكـ انكـ قادر انكـ تتخطى اى مشكلة ف حياتكـ .. خليكـ دايما واثق ف نفسكـ وخليكـ فاكر دايما "انكـ مميز " :) 

ببساطة .. عيش حياتكـ 

ثق بالله.. ثق بنفسكـ 

^_^